Miklar líkur á meirihluta fyrir umsókn

Allt bendir til þess að Ísland muni á næstu dögum eða vikum sækja um aðild að Evrópusambandinu. Sjálfstæðismenn og minnst einn þingmaður VG leggja saman til tvöfalda þjóðaratkvæðagreiðslu.

Allt útlit er fyrir að Alþingi samþykki um eða eftir helgi að sækja um aðild að Evrópusambandinu, samkvæmt heimildum Fréttablaðsins.

Tillagan mun njóta stuðnings allra tuttugu þingmanna Samfylkingarinnar, þriggja til fjögurra þingmanna Borgarahreyfingar, minnst tveggja framsóknar­þingmanna og að öllum líkindum átta eða níu þingmanna Vinstri grænna. Það eru 33 til 35 atkvæði, en einungis þarf 32 til að hún verði samþykkt.

Sjálfstæðismenn munu standa að tillögu um tvöfalda þjóðaratkvæðagreiðslu, það er að þjóðin kjósi um það síðar á árinu hvort fara eigi í aðildarviðræður. „Það mun koma fram slík tillaga og við munum styðja hana," segir Bjarni Benediktsson, formaður Sjálfstæðis­flokksins.

Ásmundur Einar Daðason, þingmaður Vinstri grænna, mun standa að þingmannatillögunni ásamt sjálfstæðismönnum, og hugsanlega fleiri þingmenn Vinstri grænna. Sjálfstæðismenn reyndu á fundi í gærkvöldi að fá jafnframt fulltrúa Framsóknarflokks og Borgarahreyfingar til fylgilags við sig en þegar blaðið fór í prentun lá ekki fyrir hverjir flutningsmenn tillögunnar yrðu.

Birgitta Jónsdóttir, þingflokksformaður Borgarahreyfingarinnar, sagðist í gærkvöldi ekki hafa gert upp hug sinn hvort hún hygðist leggja nafn sitt við tillögu sjálfstæðismanna. Höskuldur Þórhallsson, þingmaður Framsóknar­­flokksins, sagðist ekki ætla að flytja málið og vissi ekki til þess að nokkur samflokksmanna hans hygðist gera það.

Tillaga stjórnarflokkanna um aðildarumsókn var afgreidd úr utanríkismálanefnd í gærmorgun. Úr nefndinni bárust alls þrjú nefndar­álit. Hið fyrsta var frá meirihluta Samfylkingar og Vinstri grænna, auk Borgarahreyfingar.

Guðfríður Lilja Grétarsdóttir, Vinstri grænum, og Birgitta Jónsdóttir greiddu atkvæði með álitinu en gerðu fyrirvara. Fyrirvarinn laut að athugasemd Birgittu um stofnun svokallaðrar Lýðræðisstofu, sem á að annast framkvæmd þjóðar­atkvæðagreiðslu.

Fulltrúar Sjálfstæðisflokks lögðu fram eigið álit, þar sem meðal annars er lögð til tvöföld þjóðaratkvæðagreiðsla, og fulltrúi Framsóknarflokks, formaðurinn Sigmundur Davíð Gunnlaugsson, lagði fram þriðja álitið þar sem hnykkt var á þeirri afstöðu sem fram kom á landsfundi flokksins að fara ætti í viðræður samkvæmt skýrt afmörkuðum skilyrðum.

Önnur umræða um málið fer fram í dag og er talið hugsanlegt að einnig verði þingað á laugardag og atkvæði þá jafnvel greidd um málið um helgina. Takist það ekki verður málið afgreitt eftir helgi.

Össur Skarphéðinsson utanríkisráðherra sagðist í fréttum í gær vonast til þess að hægt yrði að senda formlega aðildarumsókn Íslands til Brussel jafnvel strax í lok næstu viku.