Liverpool náði aðeins jafntefli gegn Birmingham

Liverpool varð að sætta sig við 2-2 jafntefli gegn Birmingham í ensku úrvalsdeildinni í kvöld.

Liverpool fékk draumabyrjun á Anfield-leikvanginum þar sem David Ngog skoraði fyrsta mark leiksins fyrir heimamenn á 13. mínútu.

Gestirnir létu markið hins vegar ekki slá sig útaf laginu og framherjarnir Christian Benitez og Cameron Jerome komu Birmingham yfir 1-2 áður en hálfleiksflautan gall.

Liverpool sótti stíft í seinni hálfleik og Steven Gerrard, sem kom inná sem varamaður í lok fyrri hálfleiks, komst nálægt því að jafna þegar hann átti skalla í stöng.

sóknarþunginn bar hins vegar loks árangur þegar um tuttugum mínútur lifðu leiks. Ngog náði þá að leika á varnarmenn og féll í teignum eftir návígi við Lee Carsley og vítaspyrna var dæmd en gestirnir urðu æfir yfir dómnum enda átti sér stað engin snerting. Gerrard fór á punktinn og skoraði af öryggi og jafnaði leikinn 2-2.

Liverpool sótti án afláts það sem eftir lifði leiks en allt kom fyrir ekki og 2-2 jafntefli var niðurstaðan.

Liverpool hefur nú aðeins unnið einn leik af síðustu níu leikjum í deild, deildarbikar og Meistaradeild. Liverpool er í 7. sæti deildarinnar, nú 11 stigum á eftir toppliði Chelsea.