Heilbrigðisstofnunin í Eyjum segir upp starfsfólki

Starfsfólk Heilbrigðisstofnunarinnar í Vestmannaeyjum fékk afhent uppsagnarbréf í síðustu viku en uppsögnin er liður í niðurskurði sem stofnunin glímir við um þessar mundir. Öllum var boðinn nýr samningur með 5% skertu starfshlutfalli. Þetta kemur fram í frétt Eyjafrétta.

„Við erum í raun ekki að segja upp fólki en verðum að segja upp ráðningasamningi til að geta ráðið fólkið aftur á breyttum kjörum. Um leið og við afhentum uppsagnarbréfið var öllum boðin nýr ráðningasamningur með 5% skertu starfshlutfalli frá því sem áður var. Það er ekki hægt að fara aðra leið en þessa út af kjarasamningum og lögum um réttindi og skyldur starfsmanna ríkisins. Annars er þetta þriggja mánaða ferli og uppsögnin tekur í raun ekki gildi fyrr en 1. júlí næstkomandi," er haft eftir Gunnari K. Gunnarssyni, framkvæmdastjóra Heilbrigðisstofnunarinnar, í Eyjafréttum.

Sjá frétt Eyjafrétta.