Vill hefja olíuleitina strax næsta sumar

Norska olíufélagið Sagex Petrolium vonast til að geta hafið olíuleitina á Drekasvæðinu þegar á næsta ári með nákvæmum hljóðbylgjurannsóknum. Borpallur kemur hins vegar ekki á svæðið nema fleiri olíufélög fáist í verkefnið.

Fulltrúar Sagex mættu í iðnaðarráðuneytið í morgun til viðræðna um fyrsta sérleyfi til olíuvinnslu í íslenskri lögsögu, sem áformað er að úthluta fyrir lok októbermánaðar. Eftir að Aker Exploration dró umsókn sína til baka í síðasta mánuði er Sagex eini umsækjandinn.

Olíuskattar Íslands var fyrsta mál á dagskrá en fulltrúar frá ríkisskattstjóra og fjármálaráðuneyti voru á fundinum auk fulltrúa iðnaðarráðuneytis og Orkustofnunar. Forstjóri Sagex segir að skattalöggjöfin skýri að hluta lítinn áhuga olíufélaga á útboðinu í vor. Spurður hvort Sagex-menn muni óska eftir því að skattalöggjöfinni verði breytt svarar Terje að þeir séu komnir til að ræða um leyfisveitinguna og framhaldið og skattamálin séu hluti af heildardæminu.

Terje Hagevang er sá sérfræðingur sem lýst hefur mestri bjartsýni um möguleika Drekasvæðisins og hefur líkt því við auðugustu svæði Noregs. Fyrir átta árum stóð fyrirtæki hans að hljóðbylgjumælingum á Drekanum og fái félagið sérleyfið í haust verður fyrsta verkið að fara í frekari hljóðbylgjumælingar, og það strax næsta sumar. Hann segir lengra í að fyrsti borpallurinn komi á svæðið. Til að það gerist þurfi fleiri félög að sýna áhuga á Drekassvæðinu.