Ngog er enginn svindlari

Franska framherjanum David Ngog hefur skotið upp á stjörnuhimininn á methraða en þó ekki bara fyrir jákvæða hluti.

Ngog fiskaði vítaspyrnu gegn Birmingham á mánudag sem færði Liverpool eitt stig. Hann hefur í kjölfarið mátt þola mikla gagnrýni.

Umboðsmaður hans tekur umræðuna alvarlega enda er hún ekki góð fyrir skjólstæðing hans. Umbinn segir að leikmaðurinn sé enginn svindlari.

„Honum myndi aldrei detta í hug að reyna að blekkja dómarann. Þetta er vel menntaður strákur, vel upp alinn og kurteis. Hann hefur aldrei áður lent í svona vandræðum," sagði umbinn sem vinnur yfirvinnu við að laga ímynd stráksins.

„Kannski féll hann þar sem hann hafði áhyggjur af því að meiðast. Það eru oft skrautlegar tæklingar á Englandi og varnarmenn komast upp með margt."