Samdi konsert fyrir kött

Nora, fimm ára gömul læða frá Fíladelfíufylki í Bandaríkjunum, er nú orðin fræg á internetinu eftir að litháiski hljómsveitarstjórinn Mindaugas Piecaitis samdi fyrir hana konsert.

Eigandi kattarins, píanókennarinn Betsy Alexander, hafði tekið myndband af henni við að glamra á píanó. Hljómsveitarstjórinn gerði sér lítið fyrir og samdi undirleik fyrir glamrið og útsetti fyrir sinfóníuhljómsveit.

Myndband þar sem sjá má hljómsveitina spila undir píanóleik kattarins hefur svo farið eins og eldur um sinu á vefnum.

Eigandinn segir fjölda annarra kattaeiganda hafa beðið sig að kenna köttunum þeirra á píanó eftir að myndbandið birtist. Hún segir tækni kattarins góða, Nora þrýsti á lyklana í stað þess að lemja á þá.

En sjón er svo sannarlega sögu ríkari.