Viðskiptaráðherra Japans fyrrum lögga með 6. dan í aikido

Næsti viðskiptaráðherra Japans er fyrrverandi lögreglumaður á áttræðisaldri.

Shizuka Kamei er 72 ára gamall, hann hefur haft nokkur afskipti af stjórnmálum, einkum þegar hann gegndi formennsku í litlum stjórnmálaflokki sem hafði það að meginmarkmiði að stemma stigu við einkavæðingu japönsku póstþjónustunnar.

Hann varð síðar samgönguráðherra og starfaði í lögreglunni á sjöunda og áttunda áratugnum og kom að ýmsum stórmálum, til að mynda flugráninu í Tel Aviv í samvinnu við ísraelskar sérsveitir. Kamei þykir búa yfir takmarkaðri reynslu af bankamálum og viðskiptum og sóttist reyndar upphaflega eftir embætti innanríkisráðherra en japanski demókrataflokkurinn fékk það ráðuneyti í hendur og setti sinn mann þangað.

Að lokum má geta þess að nýi viðskiptaráðherrann ber sjötta gráðu svart belti í aikido en hefur auk þess gaman af því að spila golf og mála. Ein persóna í hinum japönsku manga-teiknimyndum er meira að segja byggð á honum og geta varla margir japanskir ráðherrar státað af því.