Flaug frá Noregi til að hlaupa maraþon en mætti degi of seint

Maraþonhlauparinn Stuart Hill flaug alla leið frá Noregi til að taka þátt í Reykjavíkurmaraþoninu en mætti degi of seint. Hann er ósáttur við skipuleggjendur hlaupsins sem hann segir að hafi gefið sér rangar upplýsingar dagssetningu þess í gegnum síma.

Stuart hefur tekið þátt í hlaupum um víða veröld og átti Reykjavíkurmaraþonið að vera hans stærsta hlaup þetta árið. Hann missti hinsvegar af hlaupinu, að eigin sögn vegna rangra upplýsinga sem hann fékk í samtali við skipuleggjendur hlaupsins.

„Þegar ég skráði mig var mér ekki ljós hvaða dag hlaupið færi fram. Á enskri útgáfu vefsíðunnar var ekki tekið skýrt fram hvaða dag það væri. Til að fá nánari upplýsingar hringdi ég í skipuleggjendur og var þá tilkynnt að hlaupið færi fram sunnudaginn 23. ágúst, 2009. Mér var einnig sagt að ég gæti sótt gögn vegna hlaupsins á laugardagseftirmiðdag," segir Stuart í yfirlýsingu sem hann sendir fjölmiðlum.

Stuart segir það í hæsta máta óeðlilegt að í staðfestingarpósti sem hann fékk vegna hlaupsins hafi tími og dagsetning hlaupsins hvergi komið fram. Hann segist hafa tekið þátt í fjölda víða um heim og þekki ferlið varðandi þáttöku í slíku hlaupi mjög vell.

„Ég kom til Reykjavíkur síðdegis á laugardag. Mér til mikillar skelfingar fékk ég þá að heyra að hlaupið hefði farið fram um morguninn og væri því búið," segir Stuart sem var harmi sleginn við fregnirnar.

„Aðeins sá sem stundar víðavangshlaup getur skilið vonbrigði mín að fullu. Ég hafði æft fyrir þetta hlaup sleitulaust og fórnað miklu vegna þessa. Þetta átti að vera maraþonviðburður ársins hjá mér. Undirbúningurinn kostaði bæði þrek, tíma og peninga."

Stuart segir það vera á ábyrgð þess sem heldur hlaupið að sjá til þess að keppendur fái allar upplýsingar um hlaupið. Hann segist hafa sett sig í samband við skipuleggjendur hlaupsins með það að leiðarljósi að fá einhverskonar bætur fyrir sinn skaða en mætt litlum skilningi af þeirra af hálfu. „Mér finnst þetta út í hött. Ég er hef ekki gerst sekur um mistök í þessu máli. Síðan hvenær er það ekki nóg að hringja í skipuleggjendur hlaupsins til að fá réttar upplýsingar?"

Stuart segist enn vera að jafna sig á þeim vonbrigðum sem hann varð fyrir um síðustu helgi. Hann segist vilja koma í veg fyrir að aðrir erlendir íþróttamenn lendi í samskonar óhappi vegna lélegra upplýsinga. „Ég vil koma í veg fyrir aðrir lendi í því sama og ég."