Íslendingar hafa þjóða mestar áhyggjur af einkafjárhag

Af 17 þjóðum hafa Íslendingar hafa mestar áhyggjur af einkafjárhag sínum, samkvæmt viðamikilli alþjóðakönnun um fjármálakreppuna.

Þessar áhyggjur viðra Íslendingar í könnun ICM Research í Bretlandi sem er hluti af viðameiri könnun alþjóðakannanafyrirtækisins WIN. Könnunin nær til á fimmtánda þúsund einstaklinga í 17 löndum og benda niðurstöður hennar eindregið til þess að traust almennings á bönkum og fjármálastofnunum hafi rýrnað verulega.

Ísland er í fararbroddi hvað varðar áhyggjur af einkafjárhag og segir breska blaðið Guardian, sem greinir frá könnuninni í dag, það ekki koma á óvart. Indverjar eru á hinum endanum í þessum lið og hafa minnstar áhyggjur af fjármálum sínum. Þegar á heildina er litið eru það þó Bretar sem eru hvað mest uggandi um framtíðina og segir Guardian það sæta tíðindum að þar í landi hafi menn jafnvel minna traust á bankakerfinu en íbúar hins gjaldþrota Íslands.

Þegar þátttakendur voru beðnir að gefa ríkisstjórnum sínum einkunn fyrir frammistöðuna í kreppunni var nokkuð um fall. Breska ríkisstjórnin hlaut þar 4,5 í einkunn og sú íslenska 4,4.