Miklar skattahækkanir nauðsynlegar

Fjármálaráðherra segir óumflýjanlegt að grípa til mikilla skattahækkana til að brúa fjárlagagatið á næsta ári. Fjárlagagerðin er komin á fullt skrið, en ráðherra segir hana aldrei áður hafa verið jafn erfiða.

Ríkisstjórnin samþykkti á rúmlega tveggja klukkustunda fundi í morgun fjárlagaramma fyrir næsta ár. Ljóst er að um risavaxið verkefni er að ræða en brúa verður tæplega 60 milljarða króna fjárlagagat - og beita bæði niðurskurði og skattahækkunum.

„Þetta er mjög erfitt. Ég held að fjárlagagerð hafi aldrei erfiðari en núna," segir Steingrímur J. Sigfússon, fjármálaráðherra.

Ráðherra segir ljóst að grípa verði til sársaukafullra aðgerða til að brúa fjárlagagatið. „Það er alveg ljóst að talsverður hluti af þessu, þó væntanlega minnihluti, verður á tekjuhliðina."

Aðspurður hvort hann telji að heimilin í landinu hafi bolmagn til að taka á sig frekari hækkanir sagði Steingrímur: „Það væri ákaflega gott að þurfa ekki að fara í þær hækkanir en við munum reyna sjá til þess að þetta dreifist á þann allra besta hátt sem mögulegt er með hliðsjón af því hvernig aðstæður fólks eru. Við reynum að leggja þetta á breiðari bökin eins og mögulegt er,"

Fyrir liggur að menntamál verða skorin niður um 7% og heilbrigðismál um 6%. Heilbrigðisráðherra segir ljóst að almenningur muni finna fyrir niðurskurðinum.

„Stærðargráðan er slík og vandræðin og erfiðleikarnir sem við stöndum frammi fyrir eru slíkir að það er útilokað annað en að fólk finni fyrir því. Bæði starfsmenn innan heilbrigðisþjónustunnar og þeir sem eiga hennar að njóta þó að við munum gera allt sem í okkar valdi stendur til að verja störfin og verja þjónustuna," segir Ögmundur Jónasson, heilbrigðisráðherra.