Ók á tæplega 200 kílómetra hraða

Lögreglan er búinn að handtaka ökumanninn sem reyndi að komast undan lögreglunni nú fyrir stundu. Þegar hann ók hvað hraðast þá var hann á 180 kílómetra hraða á klukkustund.

Maðurinn er á þrítugsaldri, fæddur árið 1983. Hann var með farþega í bílnum.

Lögreglan hafði fyrst afskipti af honum við Bústaðaveg en hann virti ekki stöðvunarljós lögreglunnar og ók á fullri ferð í burtu. Lögreglan veitti honum þá eftirför. Maðurinn ók þá inn í Kópavog, þaðan inn á Vesturlandsveg í átt að Grafarvoginum. Sjálfur er maðurinn búsettur þar.

Að lokum króaði lögreglan hann af og notaði til þess fjóra lögreglubíla. Hann ók utan í þá, fór út af veginum, en komst síðan aftur inn á veginn. Hann stoppaði ekki bílinn fyrr en lögreglubílar komu úr gagnstæðri átt.

Samkvæmt varðstjóra lögreglunnar þá virtist hann vera undir áhrifum. Varðstjóri bjóst sterklega við því að hann myndi gista fangageymslur lögreglunnar í nótt og sæta yfirheyrslum á morgun.