Atli kampakátur eftir að hafa loks landað sigri

„Þetta er heldur betur léttir, þetta var rosalega erfið fæðing, við áttum að vera löngu búnir að gera tvö, þrjú mörk í fyrri hálfleik. Þegar hlutirnir ganga ekki eins og lagt er upp með byrjar taugaveiklunin. Við vorum sterkari og sérstaklega eftir að við skorum markið,“ sagði kampakátur þjálfari Vals, Atli Eðvaldsson. Hann segir miðjumanninn reynda, Sigurbjörn Hreiðarsson vera herra Val.

En af hverju missir svona reynslumikið lið einbeitinguna eftir að þið komist yfir?

„Um leið og menn hætta að vinna eftir því skipulagi sem lagt er fyrir leikinn þá missa menn einbeitinguna og við lendum í vandræðum," sagði Atli.

En er sjálfstraust liðsins ekki nógu gott?

„Já heldur betur, sjálfstraustið er ekki nógu gott en við erum í mikilli naflaskoðun og reynum að koma hlutunum í lag. Þessir strákar hafa það mikla hæfileika að þeir eiga að klára þau færi sem þeir eru að fá í flestum tilfellum."

„Ég tek við þessu liði og breyti taktík en það er undir leikmönnum komið að standa sig. Ég krefst þess að menn séu í formi og að mínu mati voru menn ekki í formi þegar ég tók við liðinu, ég er ekki að gagnrýna einn né neinn en með nýjum mönnum koma nýjar áherslur. Við erum búnir að æfa mjög vel og formið er allt að koma," sagði Atli.

Aðspurður um þátt reynslumesta manns Valsliðsins, Sigurbjörns Hreiðarssonar sem dreif liðið áfram að mati undirritaðs.

„Bjössi er náttúrlega Valur númer eitt, hann er herra Valur og það þarf svoleiðis hugarfar hjá liðinu. Ég vil að menn vinni saman og taki sjálfstæðar ákvarðanir. Slíkir leikmenn henta mér mjög vel og ég vil að menn leysi vandamálin inni á vellinum. Nú er það bara næsti leikur en vissulega er bjartara yfir Hlíðarenda en verið hefur og vonandi nýta menn sér sigurinn til að gera enn betur í framhaldinu," sagði Atli Eðvaldsson, þjálfari Vals að lokum.