Óli Þórðar: KR-ingar sofandi í byrjun seinni hálfleiks

Ólafur Þórðarson, þjálfari Fylkis, var í besta skapi eftir sigur hans manna á KR í kvöld. „Ég er gríðarlega sáttur, það eru ekki mörg lið sem koma hingað og setja fjögur mörk og ná í þrjú stig," sagði Ólafur.

Fylkismenn héldu uppteknum hætti frá því sem þeir hafa verið að gera í sumar. Voru fastir fyrir og ákveðnir í sínum aðgerðum. „Við þurfum ekkert að sýna KR-ingum neina virðingu á vellinum. Við getum borið virðingu fyrir þeim utan vallar. Þetta var mjög góður sigur í dag," sagði Ólafur.

Markalaust var í hálfleik en mörkunum rigndi inn í seinni hálfleik. „Þegar menn fara að þreytast þá gera menn mistök og þá koma mörkin. Þetta voru tvö jöfn lið að mætast. Við ákváðum að liggja til baka og halda þéttleika á miðsvæðinu. Það tókst og KR-ingar sköpuðu sér lítið í fyrri hálfleik."

„Vissulega varði Ólafur Þór tvisvar mjög vel og hélt okkur inni í leiknum. Svo voru KR-ingar sofandi í byrjun seinni hálfleiks og við gátum slátrað þeim þegar Alli (Albert Brynjar) skaut í slánna."

Fylkir skaust upp í annað sæti deildarinnar með sigrinum. „Það er bara frábært, ekkert annað," sagði Ólafur að lokum.