Formaður Borgarahreyfingarinnar: Við gerðum byrjendamistök

Baldvin Jónsson, formaður Borgarahreyfingarinnar, telur flokkinn hafa gert byrjendamistök eftir að hafa náð frábærum árangri í kosningunum í vor. Þetta kom fram í skýrslu stjórnar sem Baldvin flutti eftir að landsfundur Borgarahreyfingarinnar hófst í morgun. Hann sagði núveranandi ríkisstjórn í litlu sem engu hafa breytt út frá stefnu fyrri ríkisstjórnar.

Frá því að Borgarahreyfingin hlaut fjóra þingmenn kjörna í kosningunum í apríl hefur mikið gengið á innan flokksins. Baldvin sagði vanda Borgarahreyfingarinnar undanfarna mánuði vera að miklu leyti tilkominn vegna skorts á innra skipulagi flokksins.

„Við erum ung hreyfing, í rauninni aðeins værðarvoðungur enn í pólitík, og hefur það sést á fjölmörgum mistökum sem gerð hafa verið frá því að frábærum árangri var náð í kosningabaráttunni. Mistökum sem ég vil leyfa mér að nefna byrjendamistök, mistökum sem að ég er sannfærður um að við höfum lært mikið af og munu verða til þess að tukta okkur til og styrkja í pólitísku baráttunni sem framundan er," sagði formaðurinn.

Segir ríkisstjórnina taka við skipunum frá AGS



Baldvin sagði ríkisstjórn Jóhönnu Sigurðardóttur engu betri en fyrri ríkisstjórn. Stjórnin hafi sýnt að hún sé algerlega jafn vanhæf þeirri fyrri þegar komi að lausnum á vanda heimilanna. „Hún tók einfaldlega við tilskipunum Alþjóðagjaldeyrissjóðsins og þeim aðgerðarpakka sem að hann hafði þegar lagt fram og samþykkti að framfylgja honum að öllu leyti að virðist, erlendum auðhringjum til mikillar ánægju vænti ég."



Framboð til sveitarstjórnarkosninga

Þá sagði Baldvin umræðu um mögulegt framboð Borgarahreyfingarinnar til sveitarstjórnarkosninga vera augljóslega vangaveltur sem flokkurinn þurfi að taka afstöðu til. Hvort að félagar vilji að boðið verði fram undir merkjum Borgarahreyfingarinnar eða hvort að boðið verði fram í gegnum minni grasrótarhópum á hverju svæði fyrir sig.