Ný stjórn Borgarahreyfingarinnar kjörin í dag

Landsfundur Borgarahreyfingarinnar hófst klukkan níu í morgun en hann fer fram á Grand Hótel í Reykjavík. Á eftir verða skipulags- og lagabreytingar ræddar sem og skýrslur stjórnar og þingmanna. Stjórnarkkör fer fram klukkan fjögur í dag en tveir hópar hafa tilkynnt um framboð í stjórn flokksins.

Borgarahreyfingin var stofnuð í vor og hlaut fjóra þingmenn í kosningunum 25. apríl. Síðan þá hefur mikið gengið á og eftir miklar deilur um persónur og málefni klauf Þráinn Bertelsson þingmaður sig úr flokknum, framkvæmdastjóri þingflokksins lét af störfum og formaður stjórnar Borgarahreyfingarinnar sagði skilið við flokkinn.