Eldur í vörubrettastæðu og rusli

Eldur var kveiktur í vörubrettastæðu á athafnasvæði Bykó í Kópavogi á tólfta tímanum í gærkvöldi og náði hann að læsa sig í vörugám, þannig að eldur kviknaði í innihaldi hans. Slökkviliðinu tókst að hindra að eldurinn breiddist í nálægar byggingar, en töluverðan tíma tók að slökkva í innihaldi gámsins og varð að taka allt út úr honum til að slökkva örugglega í glæðum.

Brennuvargurinn er ófundinn. Undir kvöldmat kviknaði í rusli í kjallara atvinnuhúsnæðis við Fákafen 7 til 9 í Skeifunni í Reykjavík. Slökkvikerfi fór í gang og hélt eldinum í skefjum þar til slökkvilið kom á vettvang. Í þessu sama húsnæði varð stór bruni fyrir nokkrum árum þar sem gögn og munir í vörslu þjóðminjasafnsins eyðilögðust. Eldsupptök eru ókunn.