Fullbyggður vegur ónothæfur sökum klúðurs

Samgönguyfirvöld standa nú frammi fyrir einhverju mesta klúðri í sögu íslenskra vegamála. Ekki er hægt að opna nær fullbyggðan veg í stað Öxarfjarðarheiðar þar sem Vegagerðin hafði ekki tryggt sér leyfi til að leggja síðustu tvo kílómetrana. Sveitarstjórnir á Norðausturlandi er ævareiðar.

Vegurinn sem kallast Hófaskarðsleið liggur þvert yfir Melrakkasléttu og á að tengja Raufarhöfn, Þórshöfn og Kópasker og er einhver viðamesta vegagerð sem unnið er að hérlendis um þessar mundir.

Vegarlagningin hófst fyrir tveimur árum, þrátt fyrir að bóndi einn nálægt Kópaskeri sætti sig ekki við fá veginn í gegnum sitt land. Vegagerðin taldi það ekki hindrun og virtist viss um að geta tekið land bóndans eignarnámi. Bóndinn gaf sig ekki og fór málið alla leið upp í Hæstarétt en þar hafði bóndinn sigur.

Vegagerðin situr því uppi með 30 kílómetra langan nær fullbyggðan malbikaðan veg nema það vantar tvo kílómetra í gegnum land bóndans. Sveitarstjórn Langanesbyggðar krefst þess nú að stjórnvöld bjargi klúðrinu.

Nú er komin upp sú hugmynd að leggja síðasta kaflann um land annars bónda, sem er sagður samþykkur. Það er hins vegar ekki hægt að halda áfram þar sem Skipulagsstofnun vill að sá kafli fari í umhverfismat. Á norðausturhorni landsins vilja menn ekki bíða lengur.