Erlendir ferðamenn í fyrsta sinn yfir hálfa milljón

Fimm hundruð og tvö þúsund ferðamenn fóru frá landinu í fyrra og er það í fyrsta skipti sem þeir eru fleiri en hálf milljón. Árið áður voru þeir 485 þúsund, og hefur því fjölgað um 3,5 prósent.

Á vef Ferðamálastofu segir að þrátt fyrir harðnandi samkeppni í ferðaþjónustu á alþjóðavísu sé gert ráð fyrir komum erlendra gesta til Íslands fjölgi á árinu 2009. Margir óvissuþættir séu um framhaldið, en staða bókana næstu mánuðina bendi til nokkurrar aukningar í gestafjölda og þar með viðunandi ferðaárs fyrir íslenska ferðaþjónustu.

Langflestir ferðamannanna á síðasta ári fóru um Leifsstöð eða 94,1%. 2,9% um Reykjavíkur-, Akureyrar eða Egilsstaðaflugvöll og 2,9% með Norrænu um Seyðisfjörð. Farþegar skemmtiferðaskipa eru ekki inni í þessum tölum og koma því til viðbótar.

Samkvæmt talningum Ferðamálastofu í Leifsstöð fóru 472.500 erlendir gestir frá landinu um flugvöllinn á árinu 2008, sem er aukning um 13.500 gesti eða 2,9% frá árinu áður. Allar brottfarir erlendra gesta um Leifsstöð eru inni í þessum talningum, þar með talið brottfarir erlends vinnuafl.

Brottförum Íslendinga fækkaði töluvert milli ára, eða um tíu prósent og var sú fækkun mest síðustu þrjá mánuði ársins. Þá fækkaði brottförum um helming, fóru úr 113 þúsundum í 61 þúsund.