Bretar hefðu gripið til aðgerða gagnvart Straumi

 Gylfi Magnússon viðskiptaráðherra telur ekki að ríkið hafi skapað sér skaðabótaskyldu með yfirtöku á Straumi. Kröfu­hafar hafi ekki verið hlunnfarnir á nokkurn hátt. Þetta kom fram á fundi viðskiptanefndar í gær en þar sátu fyrir svörum þeir Arnór Sighvatsson, aðalhagfræðingur Seðlabanka Íslands, og Gunnar Haraldsson, stjórnarformaður Fjármálaeftirlitsins, ásamt Gylfa.

Þeir voru meðal annars spurðir hvort þeir teldu jafnræði í því hvernig brugðist var við vanda SPRON og Straums annars vegar og Saga Capital og VBS fjárfestingarbanka hins vegar. Gylfi sagði að hefði skilanefnd ekki tekið Straum yfir um helgina hefði breska fjármálaeftirlitið gripið til aðgerða vegna útibús bankans þar í landi strax á mánudeginum.

Jón Magnússon, þingmaður Sjálfstæðisflokks, óskaði eftir fundinum og segist telja að honum loknum að yfirvöld hafi fyrst og fremst verið að hugsa um hagsmuni stórra innistæðueigenda hjá SPRON og Straumi, eins og Íbúðalánasjóðs, þegar þeir tóku bankana yfir.

Hann segist alltént ekki hafa fengið skýr svör við því af hverju harðasta ákvæði neyðarlaganna var beitt gegn bönkunum tveimur og þeir teknir yfir.

„Af hverju fékk hin venjulega löggjöf og markaðsstarfsemin ekki að hafa sinn framgang? Þeirri spurningu svöruðu þremenningarnir ekki beint,“ segir Jón í samtali við Fréttablaðið eftir fundinn. „En þeir töluðu þó þannig að þeir hefðu fyrst og fremst verið að hugsa um hagsmuni stórra innistæðueiganda þannig að þeir sætu ekki uppi með fé sitt bundið inni í stofnununum svo vikum og jafnvel mánuðum skiptir. Og þá liggur alveg í augum uppi hvað þeir eru að tala um; það er verið að tala um Íbúðalánasjóð og kannski einhverja lífeyrissjóði. Mér sýnist það vera þetta sem hafi knúið þá áfram í þessar aðgerðir.“

Hann segist ekki hafa fengið neina réttlæt­ingu á því að Saga Capital og VBS hafi fengið aðstoð í sínum vanda meðan SPRON og Straumur hafi verið teknir yfir. jse@frettabladid.is