Ekki fleiri börn fæðst síðan 1960

Rösklega 4800 börn fæddust hérlendis á síðasta ári og er kynjaskiptingin nokkuð jöfn, eftir því sem fram kemur í tölum frá Hagstofunni. Þetta eru umtalsvert fleiri börn en ári áður, en þá fæddust hér um 4600 börn. Aðeins tvisvar í sögu Íslands hafa fleiri lifandi fædd börn komið í heiminn á einu ári, en það var árin 1960 og 1959.

Aðeins um þriðjungur barna á Íslandi fæddist í hjónabandi árið 2008 eða 36%. Þetta hlutfall hefur haldist nokkuð stöðugt frá því um miðjan 10. áratug síðustu aldar. Frá 1961 til 1996 lækkaði hlutfall þeirra barna sem fæddust í hjónabandi úr 74% niður í 37% á sama tíma og hlutfall þeirra barna sem fæddust í óvígðri sambúð hækkaði úr 13% í 51%. Það hlutfall er óbreytt árið 2008.

Hlutfall barna sem fæðast utan sambúðar eða hjónabands er því nokkuð svipað og það var á árunum 1961-1965, þá voru þau um 12% allra barna sem fæddust en voru 13% árið 2008.