Tottenham á eftir Foster

Tottenham er sagt hafa áhuga á að kaupa markvörðinn Ben Foster frá Manchester United. Félagið mun vera reiðubúið að bjóða sex milljónir punda í kappann.

Carlo Cudicini, markvörður Tottenham, slasaðist nokkuð alvarlega í mótorhjólaslysi í síðustu viku. Harry Redknapp, stjóri Tottenham, er því sagður áhugasamur um að fá nýjan markvörð til liðsins.

Foster var í byrjunarliði Englands sem mætti Brasilíu í vináttulandsleik um helgina en hann er óánægður með stöðu sína hjá Manchester United.

„Ég kemst ekki einu sinni á bekkinn hjá United en er samt að spila með landsliðinu. Þetta er mjög furðuleg staða," sagði Foster.

Hann var keyptur til United frá Stoke fyrir fjórum árum síðan. Hann var í láni hjá Watford fyrstu tvö árin og var svo lengi frá vegna krossbandsslita í hné.

Foster fékk tækifæri í marki United þegar Edwin van der Sar meiddist í sumar en hann þótti ekki standa undir væntingum.