Telur að Ólafur verði við áskoruninni

Undirskriftarlisti með nöfnum tíu þúsund einstaklinga var afhentur Forseta íslands í dag en þar skorað á forsetann að staðfesta ekki lög um Icesave samkomulagið. Talsmaður kjósa.is segist trú því að forsetinn verði við þessari áskorun.

Forseti Íslands hefur enn nokkra daga til þess að staðfesta lög um ríkisábyrgð á innlánstryggingarsjóði vegna Icesave samkomulagsins sem að alþingi samþykkti á föstudag. Í dag tók hann á móti undirskriftarlista þar sem skorað er á hann að vísa málinu til þjóðarinnar.

Um tíu þúsund manns skrifuðu undir áskorunina en undirskriftarsöfnunin hefur að mestu farið fram á vefsíðunni kjósa.is.

Ólafur Ragnar Grímsson, forseti Íslands, fundaði með ábyrgðarmönnum undirskriftarlistana í um 20 mínútur á Bessastöðum en gaf fjölmiðlum ekki tækifæri á viðtali að fundi loknum.

„Ég er sannfærður um það að forseti íslands mun íhuga vandlega rökin fyrir þjóðaratkvæðagreiðslu og ég trúi því að hann muni fallast á þau já," segir Hjörtur Hjartarson, talsmaður kjósa.is.

Nokkrir tóku sér stöðu fyrir framan Bessastaði á meðan á fundi stóð til að mótmæla Icesave samkomulaginu og aðrir óskuðu eftir fundi með forseta til að leggja áherslu á kröfuna um þjóðaratkvæðagreiðslu.

„Ég vil ekki tapa þessum rétti sem við eigum almenningur að skjóta málinu til forseta í réttlætismálum. þetta er lögboðinn réttur okkar og í fleiri málum. þetta er bara eitt af mörgum málum sem ég er að vinna að ásamt fleirum," Helga Björk Magnúsdóttir Grétudóttir.