Fjórðungur jarðarbúa er íslamstrúar

Nú er talið að allt að 1,8 milljarðar manna í heiminum játi íslamstrú. Það þýðir að um það bil einn af hverjum fjórum jarðarbúum sé þeirrar trúar. Þetta er niðurstaða Pew-stofnunarinnar í Washington sem helgar sig rannsóknum og tölfræði í tengslum við trúarbrögð jarðarbúa. Amaney Jamal, aðstoðarprófessor við Princeton-háskólann, segir þessar tölur skáka rækilega þeim útbreidda misskilningi fólks að allir múslimar séu arabar og að allir arabar séu múslimar. Séu þær upplýsingar, sem fram koma í skýrslunni, réttar er íslamstrú næstútbreiddustu trúarbrögð jarðar á eftir kristni sem talið er að 2,2 milljarðar játi en næsta könnun Pew-stofnunarinnar mun einmitt snúast um að kanna fjölda kristinna til hlítar.