Framsóknarboð Óskars: Braut engar reglur

Óskar Bergsson formaður borgarráðs segir engar reglur hafa verið brotnar þegar hann hélt móttöku fyrir sveitastjórnarfulltrúa framsóknarflokksins sem sátu ráðstefnu á vegum flokksins í Ráðhúsinu. Hann segir engar athugasemdir hafa verið bókaðar í forsætisnefnd vegna málsins og heyrði fyrst af þeim í dag. Hann vill ekki svara því til hvort hann ætli að segja af sér vegna málsins.

„Það er mikilvægt að því sé haldið til haga að þetta er samkvæmt reglum. Við höfum heimildir til þess að halda móttökur og til okkar koma fjöldi félagasamtaka, grunnskólar og erlendir gestir svo eitthvað sé nefnt. Þetta er að hluta til í starfsskyldum Reykjavíkurborgar,“ segir Óskar.

Á Vísi fyrr í dag kom fram að Ólafur F. Magnússon borgarfulltrúi vill að Óskar segi af sér vegna málsins. Dagur B. Eggertsson oddviti Samfylkingar hefur einnig sagt að þau Svandís Svavarsdóttir hafi gert alvarlegar athugasemdir vegna móttökunnar í forsætisnefnd, auk þess sem málið hafi ekki verið lagt fram til samþykktar heldur kynningar í nefndinni.

„Það er samkvæmt reglunum, forsætisnefnd er einungis upplýst um hvaða móttökur og fundir eru fyrirhugaðar og það er ekki lagt fram til samþykktar. Hinsvegar lögðu þau ekki fram neina bókun eða gerðu formlegar athugasemdir. Ég var ekki á þeim fundi og fékk engar upplýsingar um að þau hefðu gert athugasemdir við málið fyrr en í dag,“ segir Óskar.

Hann segir móttökur sem þessar hafa minnkað um þriðjung á árinu 2008.

„Það er samt ekki þannig að þær móttökur sem eftir standa séu eitthvað óeðlilegar. Það er kannski vegna þess að þetta voru framsóknarmenn sem Ólafur F. Magnússon sér rautt í þessu yfirliti forsætisnefndar. Það hefur aldrei verið reynt að fela neitt í þessu og þetta hefur verið uppi á borðum síðan 4. Nóvember,“ segir Óskar.

Óskar segir tilefni fundarins hafa verið að gera samherjum sínum grein fyrir því hvernig unnið sé að málum í Reykjavík eftir að nýi meirihlutinn tók við. Hann segir samstarfið með minnihlutanum hafa verið með ágætum.

„Ég vildi því upplýsa mina kollega um það hvernig haldið væri á málum eftir að við náðum þverpólitískri samstöðu um aðgerðaráætlun Reykjavíkurborgar. Þetta var fundur sem lauk með síðdegisboði og það var alls ekki verið að halda neitt partý á mínum vegum,“ segir Óskar sem vill ekki svara því til hvort hann ætli að segja af sér vegna málsins.

Um 25 framsóknarmenn voru í boðinu sem kostaði tæplega 90 þúsund krónur að sögn Óskars en þar var boðið upp á léttvín, bjór, gosdrykki og snittur.

Óskar segir fordæmi fyrir álíka móttökum hjá öllum stjórnmálaflokkum að F-lista undanskildum og það hafi ekki verið gerðar neinar athugasemdir fram að þessu.

Hann segir að Vinstrihreyfingin grænt framboð hafi haldið svipað boð árið 2004 þar sem 30-40 sveitarstjórnarmönnum flokksins hafi verið boðið í álíka boð. Hann hafi því talið sig vera í fullum rétti áður en hann hélt boðið og telur að svo sé enn.

„Ef menn vilja breyta þessum reglum þá er það bara önnur umræða.“