Dagur og Svandís gagnrýndu veisluhöld Óskars

Borgarfulltrúar Samfylkingarinnar og Vinstri grænna, Dagur B. Eggertsson og Svandís Svavarsdóttir, segjast hafa gagnrýnt áform Óskars Bergssonar vegna fundar sem hann hélt með sveitarstjórnarfulltrúum Framsóknarflokksins í Ráðhúsinu.

Fullyrt var á Vísi fyrr í dag að Dagur hefði samþykkt beiðni Óskars um að halda boðið. Hann segir þetta vera alrangt. Hann og Svandís Svavarsdóttir hafi þvert á móti, gert alvarlega athugasemdir við það. Auk þess hafi málið ekki verið lagt fram til samþykktar heldur til kynningar í forsætisnefnd borgarstjórnar. Það var þann fjórða nóvember en boðið var haldið tíu dögum síðar.

Ólafur F. Magnússon krafðist afsagnar Óskars vegna málsins á borgarstjórnarfundi í dag. Hann sakaði þá Óskar um að misnota aðstöðu í Ráðhúsinu.