Innlent

Valhöll brunnin til kaldra kola

Hótel Valhöll er brunnin til grunna og nú standa einungis steinveggir þar sem hinn reisulegi burstabær áður stóð. Engu var hægt að bjarga að sögn slökkviliðsmanna á staðnum og hægt verður að moka rústunum í burtu.

Eldurinn kom upp á fimmta tímanum í dag en grunur leikur á að hann hafi átt upptökin sín í háfi í eldhúsinu meðan verið var að grilla. Slökkviliðið fékk aðstoð frá slökkviliðum í Árnessýslu en þrátt fyrir það tókst ekki að bjarga neinu þar sem eldurinn dreifðist svo hratt út.

Á plani Valhallar stóð tankur fullur á díselolíu og lagði slökkvilið miklá áherslu á að kæla hann vegna sprengihættu.

Nýir rekstraraðilar tóku við rekstri hótelsins í maí og því aðeins séð um hótelið í um tvo mánuði.

Á hótelinu voru fimm gestir og brunnu allar eigur þeirra. Ungt íslenskt par sem fréttastofa ræddi við missti fartölvu, myndavél og ýmislegt fleira í brunanum en þau voru ekki á hótelinu þegar eldurinn kom upp.

Í þessum bruna brann ekki einungis falleg bygging, heldur heilmikil saga þar sem rekja má sögu hússins aftur til nítjándu aldar.




Tengdar fréttir

Símstöð brann í Valhöll

Lítil símstöð í eigu Símans var inni í Valhöll sem stendur nú á björtu báli. Þetta þýðir að um þrjátíu viðskiptavinir á svæðinu munu missa talsamband. Tekið gæti nokkra daga að koma upp nýrri símstöð en að sögn upplýsingafulltrúa Símans verða hafðar hraðar hendur við að koma viðskiptavinum aftur í samband.

Sprengihætta í Valhöll

Lögregla og Slökkvilið vilja koma á framfæri þeim boðum til almennings að halda sig í góðri fjarlægð frá eldstaðnum á Þingvöllum vegna sprengihættu. Á það við umferð á landi sem og úr lofti.

Líklega kviknað í útfrá háfi í eldhúsi

Grunur leikur á kviknað hafi í útfrá háfi í eldhúsi Hótels Valhallar þegar verið var að grilla. Eldurinn kom upp um fjögurleytið í dag og hefur breiðst hratt út.

Eldur í Valhöll á Þingvöllum

Eldur braust út í Valhöll á Þingvöllum nú fyrir stundu. Slökkviliðið á höfuðborgarsvæðinu er á leiðinni á staðinn en ekki fengust nánari upplýsingar um málið.

Mest lesið


Fleiri fréttir

Sjá meira


×

Mest lesið