Stjórnarformaður OR: Arðgreiðslan stendur

„Við viljum borga eigendum okkar arð svo þeir geti sett peningin út í samfélagið," segir Guðlaugur Sverrisson stjórnarformaður Orkuveitu Reykjavíkur en trúnaðarmenn hennar hafa mótmælt harkalega 800 milljón króna arðgreiðslu á sama tíma og starfsmenn lækka í launum.

Guðlaugur segir að ákvörðunin muni standa.

Þá bendir Guðlaugur á að arðgreiðslan, sem var samþykkt síðustu áramót, hefði verið lækkuð úr 1,6 milljarði niður í 800 milljónir. Það var gert í samráði við eigendur Orkuveitunnar.

Reykjavíkurborg fær meirihlutann af arðgreiðslunni eða tæp 94 prósent. Restin skiptist niður á Akranes og Borgabyggð.

Spurður hvort það hafi komið til greina að greiða ekki út arðinn segir Guðlaugur að svo hafi verið. „En menn voru líka sammála því að sveitarfélögin þyrftu þetta fé vegna mikils niðurskurðar," segir hann.

Guðlaugur segir að það hafi að sjálfsögðu ekki verið fyrirséð hvernig færi með launalækkanir starfsmanna og þá erfiðleika sem nú standa fyrir dyrum þegar ákvörðunin um greiðslunar voru teknar.

„Við þurftum að lækka laun starfsmanna. Allir hafa þurft að taka á sig byrðar því annars hefði stefnt í uppsagnir," segir Guðlaugur um lækkun launa starfsmanna.

Stjórnarfundur Orkuveitunnar verður haldinn á morgun. Spurður hvort ákvörðunin um endurgreiðslu verði endurskoðuð svarar Guðlaugur einfaldlega: „Hún stendur."

Spurður um viðbrögð trúnaðarmanna starfsmanna Orkuveitunnar segir Guðlaugur að þau hafi komið sér á óvart. Ákvörðunin hafi legið fyrir síðan um áramót.

„Ég tel að við eigum ekki í deilu við starfsfólk þó svo að trúnaðarmenn taki þetta upp núna," segir Guðlaugur að lokum.