Kannast ekki við óánægju starfsmanna vegna arðgreiðslna

Hjörleifur Kvaran, forstjóri Orkuveitu Reykjavíkur, kannast ekki við óánægju meðal starfsmanna fyrirtækisins um arðgreiðslur OR til eigenda. Hann segir að fyrirtækið hafi greitt eigendum sínum arð í mjög langan tíma og árlega, nokkuð óháð því hver útkoma fyrirtækisins hafi verið fjárhagslega.

Fréttastofa RÚV greindi frá því í hádeginu að trúnaðarmenn hjá Orkuveitu Reykjavíkur telji að kominn sé upp trúnaðarbrestur á milli starfsmanna Orkuveitunnar og stjórnar hennar. Ástæðan sé sú að starfsmenn hafi samþykkt að taka á sig launalækkanir sem myndu spara fyrirtækinu 400 milljónir króna. Á sama tíma væri fyrirtækið að greiða eigendum 800 milljónir í arð. Orkuveitan tapaði 73 milljörðum í fyrra.

Hafa hingað til greitt 1600 milljónir

Hjörleifur segir að Orkuveitan hafi á undanförnum árum greitt eigendum um 1600 milljónir króna í arð árlega. Sú upphæð hafi hækkað með verðlagi. „Um síðustu áramót var séð hver útkoman yrði á þessu ári vegna þess hvernig gengið væri að leika okkur. Þá var samið um að lækka þessa upphæð um helming," segir Hjörleifur. Hann bendir því á að arðurinn sem er greiddur núna sé helmingurinn af því sem hann hafi verið undanfarin ár. „Með því má segja að eigendurnir séu að taka á sig líka hluta af þeim erfiðleikum sem eru uppi," segir Hjörleifur. Hann segir að þetta sé ekkert nýtt heldur hafi þessar upplýsingar legið fyrir frá síðustu áramótum.

„Svo skulum við líka hafa það í huga að arðgreiðslurnar, sem eru að renna til eigendanna, að þær fara til samfélagsins. Þær eru ekki að fara í vasa neinna auðmanna," bendir Hjörleifur á. Hann segir að greiðslurnar renni til sveitarfélaganna, Reykjavíkurborgar, Akraness og Borgarbyggðar. Þær renni síðan til samfélagslegra verkefna og nýtist borgurunum með beinum hætti.