Ancelotti: Engin krísa hjá Chelsea

Carlo Ancelotti, stjóri Chelsea, er ekki á því að það sé einhver krísa í herbúðum Chelsea þó svo liðið hafi ekki unnið fjóra síðustu leiki sína og gerði í dag 3-3 jafntefli gegn Everton á heimavelli.

„Hver getur eiginlega sagt að það sé einhver krísa hjá okkur? Ég sé ekki neina krísu. Þegar ég lít á málið í heild sinni þá er ég á því að mitt lið hafi leikið mjög vel," sagði Ancelotti.

„Við unnum ekki en slíkt getur gerst í fótbolta. Við vorum að verjast of nálægt okkar eigin marki. Það var algjör óþarfi. Við höfum enn sömu möguleika og áður að vinna titilinn. Það er mikið eftir af tímabilinu."