Var minnt á biðlaunaréttinn

Margt reyndasta starfsfólk Ríkisútvarpsins var fyrir jól minnt á rétt sinn til tólf mánaða biðlauna, yrði staða þess lögð niður. Þessi biðlaunaréttur, sem á við um fólk sem hefur unnið hjá RÚV síðan fyrir 1997, rennur út um áramót.

Sigrún Stefánsdóttir, dagskrárstjóri útvarpsins, segir þetta gert með góðum vilja og í ljósi yfirvofandi niðurskurðar.

„Ef einhver hefði áhuga á að hætta þá væri hugsanlega hægt að gera við hann starfslokasamning, sem er þá bara góður kostur fyrir viðkomandi, en engin ógnun við einn eða neinn," segir hún. Sigrún hafi fyrst og fremst viljað kanna hvort einhverjir hefðu áhuga á að hætta. Ef segja þurfi upp fólki, þá megi með þessum hætti komast hjá því að segja upp öðru fólki, starfsmönnum sem ekki vilja hætta og ekki eigi þennan rétt. Sigrún veit ekki til þess að nokkur ætli að nýta sér þennan kost og vill ekki gefa upp við hversu marga starfsmenn hún talaði.

Samkvæmt heimildum blaðsins var meðal annars rætt um biðlaunaréttinn við þau Hönnu G. Sigurðardóttur, Lönu Kolbrúnu Eddudóttur, Lísu Pálsdóttur, Magnús Einarsson, Sigríði Stephensen og Ævar Kjartansson.

Sigrún Stefánsdóttir vill hvorki neita né játa því að hafa talað við þetta fólk. Spurð hversu mörgum hún búist við að þurfa að segja upp störfum, segist Sigrún vonast til að aðgerðirnar verði eins mildar og hægt sé. Hún reyni að hlífa störfum eftir fremsta megni. - kóþ