Kínverjar taka forystuna

Yvo de Boer, framkvæmdastjóri rammasamnings Sameinuðu þjóðanna um loftslagsmál, segir að Kínverjar ætli sér stóra hluti í baráttu heimsbyggðarinnar gegn losun gróðurhúsalofttegunda og hlýnun jarðar.

„Bæði Kínverjar og Indverjar hafa kynnt mjög metnaðarfull áform í loftslagsmálum. Hvað Kínverja varðar eru áformin það metnaðarfull að þeir gætu hæglega tekið forystuna í baráttunni gegn loftslagsbreytingum,“ sagði de Boer í gær. „Stóra spurningarmerkið er hins vegar Bandaríkin.“

Leiðtogar hundrað ríkja koma saman í New York í dag í þeirri von að blása megi nýju lífi í samningaviðræður um aðgerðir í loftslagsmálum. Í desember stendur síðan til að nýr samningur verði lagður fram á loftslagsráðstefnu Sameinuðu þjóðanna í Kaupmannahöfn, en vonir höfðu dvínað um að sá samningur yrði að veruleika.

Hu Jintao, forseti Kína, ætlar að kynna hin metnaðarfullu áform í dag. Einnig hyggst Barack Obama Bandaríkjaforseti flytja ræðu á leiðtogafundinum í dag.

Saman bera Kínverjar og Bandaríkjamenn ábyrgð á 40 prósentum af útblæstri gróðurhúsalofttegunda.- gb