Starfsmenn Granda vilja fá launauppbót

„Að sjálfsögðu mun ég ræða þetta við forráðamenn Granda,“ segir Sigurður Bessason, formaður verkalýðsfélagsins Eflingar. Hann var spurður um viðbrögð við ákvörðun stjórnar HB-Granda um að greiða eigendum 150 milljónir í arð, en hagnaður af fyrirtækinu nam einum 2,3 milljörðum á síðasta ári. Áður umsömdum launahækkunum verkafólks, upp á 13.500 krónur, var frestað nýlega, í ljósi efnahagsástandsins.

Vilhjálmur Birgisson, formaður Verkalýðsfélags Akraness, hefur skorað á HB-Granda að greiða út þessar launahækkanir.

Sigurður segir að forráðamenn fyrirtækisins hljóti að útskýra þetta fyrir sínum starfsmönnum. Honum þyki ákvörðunin slæm. „Þetta er hins vegar ákvörðun stjórnarinnar og ég veit ekki hvort við getum hnikað henni,“ segir hann.

Anna Norris, trúnaðarmaður starfsmanna, segir sitt fólk ekki ánægt með arðgreiðsluna. Reyndar séu flestir starfsmenn útlendingar og hún sé ekki viss um hversu mikið þeir hafi sett sig inn í málin.

„Það hefur lítið verið talað um þetta enn þá, en fólk hefur rætt um að fyrst fyrirtækinu hafi gengið svona vel, þá ætti það að borga fólkinu launauppbót. Þá myndi enginn segja neitt eða skipta sér af þessu,“ segir hún.

Starfsmennirnir hafi ekki rætt um að stöðva vinnu eða slíkt, enda ríki yfirleitt mjög góður andi á vinnustaðnum. „Það verður frekar í næstu viku ef ekkert kemur frá þessum forstjórum, þá gæti maður farið að heyra eitthvað,“ segir Anna. Verkalýðsfélögin eigi annars að sjá um þessa hluti.

Í stjórn Granda sitja þeir Árni Vilhjálmsson, Kristján Loftsson, Halldór Teitsson, Hjörleifur Jakobsson og Ólafur Ólafsson.

Fyrirtækið sendi frá sér yfirlýsingu í gær, þar sem sagði að arðgreiðslur fyrirtækisins í ár væru afar hóflegar; átta prósent í stað venjubundinna tólf.

klemens@frettabladid.is