Tryggvi: Hefur verið sérstakt tímabil

Tryggvi Guðmundsson var vitanlega alsæll með Íslandsmeistaratitil FH eftir 2-0 sigur á Val í dag.

Tryggvi hefur verið lykilmaður í meistaraliði FH undanfarin ár en hlutverk hans í sumar var þó á köflum annað en hann er vanur.

„Þetta er búið að vera nokkuð sérstakt tímabil hjá mér,“ sagði Tryggvi sem mátti sætta sig við að sitja á varamannabekknum um tíma. „Það var nýtt. Mér fannst ég þó taka því ágætlega og koma sterkur inn í liðið á ný þegar að þurfti á mér að halda.“

„Ég hef því upplifað það í sumar að vera fyrirliði í þremur leikjum og sitja svo á bekknum í 4-5 leiki. Það er því stutt á milli í þessum bransa.“

Hann segir það vitanlega alltaf sætt að verða Íslandsmeistari. „Ég verð samt að viðurkenna að þetta var kannski aðeins sætara í fyrra þegar við tókum titilinn á síðustu stundu.“

„En það er aldrei hægt að segja að það hafi verið skylduverk hjá okkur að verða Íslandsmeistari. Það þarf að mæta vel undirbúinn til leiks enda er deildin sterk. Það liggur því afar mikil vinna að baki.“

FH tapaði nokkrum stigum í síðasta mánuði þegar nokkrir leikmenn voru frá vegna meiðsla.

„Það er lengi búið að tala um að við erum með breiðan hóp. Það kom svo á daginn að við þurftum á öllum okkar mönnum að halda og það stóðu allir fyrir sínu.“

Sjálfur á Tryggvi eitt ár eftir af samningi sínum við FH og stefnir því á að halda áfram.

„Mér finnst enn mjög gaman í FH og í boltanum. Ég vil meina að ég hafi eitthvað í þessa deild að gera. Ég ætla að fagna titlinum í kvöld og næstu daga og svo fer maður að gera sig kláran fyrir næsta mót.“