Þriðju Icesave-umræðu frestað á miðnætti

Þriðju umræðu um Icesave-frumvarpið var frestað rétt fyrir miðnætti og var fjárlaganefnd boðuð á fund klukkan hálfeitt í nótt. Þá voru níu þingmenn enn á mælendaskrá. Ástæða frestunarinnar var að nýjar upplýsingar bárust frá breskri lögmannsstofu sem stjórnarandstæðingar segja benda til þess að tilteknum upplýsingum hafi verið haldið leyndum fyrir Alþingismönnum.

Kröfðust stjórnarandstæðingar þess að Svavar Gestsson sendiherra yrði kvaddur á fund nefndarinnar til að gera grein fyrir málinu. Össur Skarphéðinsson utanríkisráðherra staðfesti á Alþingi í gærkvöldi að hann hefði ekki séð umrædd gögn. Til stóð að greiða atkvæði um Icesave-málið í dag, en nú er allt í óvissu um framgang málsins.