Leiðir nefnd Evrópuþingsins í ESB viðræðum við Íslendinga

Pat Gallagher, rúmlega sextugur Íri og meðlimur á Evrópuþinginu, hefur verið valinn til að fara fyrir nefnd á vegum Evrópuþingsins sem mun taka þátt í samningaviðræðum ESB við Ísland.

Þetta kemur fram í írska blaðinu Sunday Business Post. Gallagher starfaði meðal annars við útflutning á fiski áður en hann lét til sín taka í stjórnmálum.

Samkvæmt írska blaðinu mun Gallagher leiða nefndina sem mun sjá um samskipti við íslenska þingmenn.

Haft er eftir Gallagher að hann trúi því að samningaviðræðurnar milli Íslands og Evrópusambandsins muni eiga sér stað af festu og mikil samvinna verði milli aðila.

Nefndin sem Gallagher fer fyrir er þó ekki hin eiginlega samninganefnd sem taka mun þátt í viðræðum við Íslendinga þegar fram í sækir. Sú nefnd mun verða skipuð af framkvæmdastjórn ESB en nefndin á vegum Evrópuþingsins mun koma að viðræðunum að einhverju marki. Að sögn Urðar Gunnarsdóttur hjá utanríkisráðuneytinu liggur ekkert fyrir hvenær sú nefnd verði skipuð.