Brooks og Burt minnast Doms

Mel Brooks og Burt Reynolds eru á meðal þeirra sem hafa talað hlýlega um gamanleikarann Dom DeLuise sem lést í Los Angeles á dögunum, 75 ára gamall.

Brooks, sem leikstýrði DeLuise í fjölda mynda, sagði hann hafa verið stóran í öllum skilningi þess orðs. „Hann var stór í sniðum og fékk fólk til að hlæja mikið og gleðjast,“ sagði hann.

Reynolds, sem lék oft á móti DeLuise, bætti því við að hann hefði ávallt látið sér líða vel.

„Það mun enginn koma í stað hans,“ sagði hann.

DeLuise lést síðastliðinn mánudag á sjúkrahúsi í Santa Monica eftir langvarandi veikindi. Hann er best þekktur fyrir leik sinn í myndum Mel Brooks, Blazing Saddles, Silent Movie og History of the World: Part I.

Hann lék einnig á móti Reynolds í myndum á borð við The End, The Cannonball Run og Smokey and the Bandit II.

DeLuise var mikill matmaður og átti lengi í baráttu við offitu, enda vó hann á tímabili 147 kíló. Hann lætur eftir sig eiginkonu og þrjá syni sem allir eru leikarar.