Heimir Hallgríms: Dómarinn tók af okkur tvö stig

Heimir Hallgrímsson, þjálfari ÍBV, var nokkuð sáttur eftir jafnteflið gegn Val en liðin mættust á Hásteinsvelli í dag.

„Okkar leikur var bara góður, mér fannst við spila varnarleikinn mjög vel. Þeir áttu fá færi en fengu gefins vítaspyrnu. Það var bara skandall, hræðilegur dómur. Andri stendur meter frá manninum og fær boltann í hendina en hendurnar á Andra voru við síðuna þannig að hvað gat hann gert? Klárlega rangur dómur að mínu mati," sagði Heimir ósáttur en fannst hann dómarinn gefa Valsmönnum stigið?

„Engin spurning, Valsmenn voru ekki að skapa sér mikið af færum og dómarinn var að taka af okkur tvö stig," sagði Heimir en hefði hann sætt sig við stigið fyrir leik?

„Nei, alls ekki. Við lögðum þennan leik upp með það að vinna og ég er alls ekki sáttur. Við eigum gríðarlega erfiða leiki eftir úti á móti Keflavík, KR og FH og heima á móti Grindavík. Þetta áttu að vera auðveldustu 3 stigin sem eftir voru og við ætluðum okkur að hirða þau."