Steingrímur: Orð Bjarna um stjórnarslit skipta engu

Steingrímur J. Sigfússon fjármálaráðherra segir yfirlýsingar formanns Sjálfstæðisflokksins um að ríkisstjórnin eigi að fara frá fallist Bretar og Hollendingar ekki á Icesave fyrirvarana, hafa litla pólitíska þýðingu og séu ekki til annars en heimabrúks innan Sjálfstæðisflokksins.

Bjarni Benediktsson formaður Sjálfstæðisflokksins sagði á fundi með flokksmönnum í Valhöll í morgun að ef Bretar og Hollendingar fallist ekki á fyrirvara Alþingis vegna Icesave, sé ljóst að ríkisstjórnin hafi ekki einungis skrifað undir samning án tryggðs meirihluta í eigin röðum, heldur lofað að veita ríkisábyrgð fyrir samningum sem hún geti ekki staðið við. Ef þessi staða komi upp þá sé einnig fullreynt með samningaleiðina gagnvart Bretum og Hollendingum og reyna ætti dómstólaleiðina

Steingrímur segir að ef sú staða kæmi upp að Bretar og Hollendingar samþykktu ekki fyrirvarana þá væru stjórnarslit líklegast það sem Íslendingar mættu síst við.