Atli: Rauða spjaldið á Bjarna Ólaf var réttmætt

Atli Eðvaldsson, þjálfari Vals, var tiltölulega sáttur með stigið sem hann fékk í Eyjum í dag og tók með sér í bæinn.

„Mér fannst við vera ágætir, það er margt að breytast í okkar leik frá því ég tók við og ég er bara nokkuð sáttur. Þetta spilaðist þó ekki eins og við lögðum upp með, að fá á sig rautt spjald, og strax fáum við á okkur mark úr aukaspyrnunni þar sem Atli og Reynir hlupu saman og þeir sleppa í gegn," sagði Atli sem kvartaði ekki yfir rauða spjaldinu sem Bjarni Ólafur fékk.

„Þetta var rétt hjá dómaranum. Bjarni Ólafur stingur út hendinni þegar maðurinn er að sleppa upp kantinn og það leit út fyrir að vera olnbogaskot þó svo að ég viti að þetta var alls ekki viljandi hjá Bjarna," sagði Atli en hvað fannst honum um vítaspyrnudóminn?

„Það er alltaf erfitt að dæma í svona aðstæðum, maðurinn fær boltann tvisvar sinnum í röð í hendina og ef hann stoppar fyrirgjöf með hendinni þá er það náttúrulega bara brot," sagði Atli en hefði hann sætt sig við stigið fyrir leik?

„Nei, maður væri sáttur ef við hefðum spilað illa og fengið eitt stig en það var ekki það sem við vonuðumst eftir. Við ætluðum að reyna að setja á þá eitt mark í strax í byrjun fyrri hálfleiks en það gekk ekki. Við ætluðum því að ná markinu í byrjun seinni hálfleiks en það gekk ekki upp þar sem við fengum á okkur rautt spjald og mark svo strax upp úr því."