Stærði sig af líflegu kynlífi

Dómstólar í Sádi-Arabíu hafa dæmt 32 ára gamlan mann í fimm ára fangelsi fyrir að stæra sig af líflegu kynlífi sínu í sjónvarpi. Fangelsisdómurinn dugði þó ekki alveg sem refsing því honum er líka gert að þola þúsund svipuhögg.

Mazen Abdul Jawad, fjögurra barna faðir, fór mikinn í þættinum „Þykka rauða línan“ sem er á dagskrá líbanska sjónvarpsins. Hann talaði um unað sinn af kynlífi og lýsti því þegar hann missti sveindóminn fjórtán ára gamall. Þá var hann myndaður í svefnherberginu umkringdur leikföngum ástalífsins.

Þættinum lauk þar sem Jawad var fylgt eftir í ökuferð um stræti borgarinnar Jeddah, sem er skammt frá Mekka, í leit að vænlegum kvenkosti.

Þessi opinberun Jawads fór svo fyrir brjóstið á sádi-arabískum yfirvöldum að hann var dæmdur og útibúi líbönsku stöðvarinnar í Jeddah og Riyadh lokað. Jawad var dæmdur eftir íslömskum sharia-lögum en samkvæmt þeim er samneyti karla og kvenna mjög takmarkað. Þá mega karlar ekki stunda kynlíf áður en þeir ganga í það heilaga.

Áður en dómur féll hafði Jawad beðist afsökunar. Einnig sakaði hann líbönsku sjónvarpsstöðina um að taka ummæli hans úr samhengi. - th