Samskipti ríkjanna enn stirð

Recep Tayyip Erdogan, forsætisráðherra Tyrklands, segir að Armenar verði að yfirgefa Nagorno-Karabach, fjallahérað í Aserbaídsjan sem að mestu er byggt Armenum. Þetta sagði hann í gær, daginn eftir að Tyrkland og Armenía undirrituðu samning um að hefja stjórnmálasamskipti á ný eftir sextán ára hlé.

Samningur Tyrklands og Armeníu á laugardag þykir sögulegur, því samband ríkjanna hefur áratugum saman verið ákaflega stirt. Tyrkir hafa aldrei viljað fallast á að fjöldamorð Tyrkja á Armenum fyrir tæpri öld geti fallið undir þjóðarmorð. Auk þess hafa þjóðirnar deilt hart um hernám Armena á Nagorno-Karabach árið 1993.

Samningur Tyrkja og Armena var undirritaður á laugardag, en fram á síðustu stundu stóðu yfir deilur um orðalag í yfirlýsingum beggja ríkjanna, sem gefa átti í kjölfar undirritunar samningsins. Sú deila var leyst með því að hvorugt ríkið sendi frá sér yfirlýsingu.

Óvíst er hvort ummæli Erdogans um að Armenar verði að láta Nagorno-Karabach af hendi setji samskipti ríkjanna í uppnám að nýju. Aserar segja hins vegar að endurupptaka stjórnmálasambands Tyrkja og Armena varpi skugga á annars nána vináttu Tyrkja og Asera.- gb