Óvissa um framhaldið hætti Abbas

 Bernard Kouchner, utanríkisráðherra Frakklands, segir það ógna friðnum geri Mahmoud Abbas alvöru úr yfirlýsingum sínum um að bjóða sig ekki fram til næsta kjörtímabils.

Ahmet Davutoglu, utanríkisráðherra Tyrklands, sem var í heimsókn hjá starfsbróður sínum í Frakklandi, sagðist vona að ákvörðun forseta Palestínustjórnar væri ekki endanleg.

Bjóði Abbas sig ekki fram í janúar gæti það aukið sigurlíkur Hamas-samtakanna, andstæðinga Fatah-hreyfingarinnar, sem Abbas hefur stjórnað síðan Jasser Arafat féll frá árið 2004.

Fatah-hreyfingin mun líklega bjóða fram Nasser Al-Kidwa, fimmtugan frænda Arafats, sem hefur verið fulltrúi Palestínustjórnar hjá Sameinuðu þjóðunum.

Einna líklegast þykir þó að Marwan Barghouti, Fatah-maður sem hefur setið í fangelsi í Ísrael árum saman, beri sigur úr býtum. Barghouti bauð sig fram árið 2004, þrátt fyrir að sitja í fangelsi, en dró framboð sitt til baka vegna þrýstings frá áhrifamönnum í Fatah.

Abbas sagðist ekki hafa áhuga á að gegna embættinu lengur vegna pattstöðu í friðarmálum, sem hann sakar bæði Ísraela og Bandaríkin um að bera ábyrgð á. - gb