Lífeyrissjóður neitar stjórnarmönnum VR um upplýsingar

Lífeyrissjóður Verslunarmanna neitar að gefa stjórnarmönnum VR upplýsingar um gjaldeyrissamninga, og verðbréfasafn sjóðsins með þeim rökum að verið sé að vernda lántakendur hans. Varaformaður VR segir þetta óskiljanlegt og engin rök haldi í þessum efnum.

Lífeyrissjóður Verslunarmanna gerði gjaldeyrissamninga upp á tæpa hundrað milljarða króna á síðasta ári. Sjóðurinn neitaði fyrr í sumar að gefa Ragnari Þór Ingólfssyni stjórnarmanni VR og sjóðsfélaga stöðuna á samingunum. Nýir stjórnarmenn í VR sem komu inn í vor hafa einnig óskað eftir upplýsingum um verðbréfasafn sjóðsins, stöðu lána og eigna en án árangurs.

Bjarki Steingrímsson varaformaður VR er í þeim hópi og segir stjórn sjóðsins hafa staðfastlega neitað beiðni þeirra. Bjarki segir brýnt að sjóðurinn opni bókhald sitt fyrir sjóðsfélögunum til að skapa trúverðugleika.