FH-ingar á faraldsfæti

FH-ingarnir Matthías Vilhjálmsson og Davíð Þór Viðarsson hafa vakið athygli félaga á Norðurlöndunum sem hafa óskað eftir því að fá þá til reynslu.

Davíð Þór, fyrirliði FH, hefur þegar leikið í Noregi og Belgíu en nú er það danska félagið Álaborg sem hefur sýnt honum áhuga.

„Ég er nýkominn heim úr fríi og ég hef eitthvað heyrt af áhuga Álaborgar. Mér finnst ekki ólíklegt að ég fari til félagsins á reynslu en við eigum enn að finna tíma til þess," sagði Davíð í samtali við Vísi.

Það er þó þegar ákveðið að Matthías Vilhjálmsson fer til norska félagsins Start þann 11. október næstkomandi og mun æfa hjá félaginu í tíu daga. Þetta staðfesti Matthías í samtali við Fréttablaðið.