Byssumaður á sjúkrahúsi

Nidal Malik Hasan, majór í bandaríska hernum, var fluttur á sjúkrahús strax á fimmtudagskvöld eftir að hann hafði drepið þrettán manns og sært tugi annarra í herstöðinni Fort Wood í Texas.

Lögreglan hugðist yfirheyra Hasan strax og heilsufar hans leyfði, en hann var ekki talinn í lífshættu. Árásin kom þeim sem þekktu hann mjög á óvart.

Hasan er 39 ára gamalla múslimi sem hafði stundað læknisnám á vegum hersins og sérhæfði sig í geðlækningum með áherslu á áföll og forvarnir. Bænaleiðtogi í mosku, sem Hasan sótti reglulega, sagði hann ekki hafa aðhyllst öfgaskoðanir af neinu tagi. Hann hafi lagt metnað í hermennskuna og oft klæðst herbúningnum við bænahald.

Hasan fór samt ekki dult mað andstöðu sína við hernað Bandaríkjanna í Afganistan og Írak. Hann hafði gert sér vonir um að Barack Obama Bandaríkjaforseti myndi kalla herinn heim frá báðum þessum löndum, og átti stundum í deilum við aðra í hernum sem styðja stríðsreksturinn.

Fyrir hálfu ári vakti Hasan að vísu athygli lögreglunnar vegna netskrifa um sjálfsvígsárásarmenn, þar sem þeir voru meðal annars lagðir að jöfnu við hermenn sem fleygðu sér yfir handsprengju til þess að bjarga lífi félaga sinna. Málið hafði ekki verið rannsakað og ekki er staðfest að hann hafi í raun skrifað þetta.

Fyrir stuttu var honum svo tilkynnt að senda ætti hann úr landi. Heimildar­menn innan hersins segja að hann hafi átt að fara til Íraks.

Mikil ringulreið varð í herstöðinni þegar hann tók að skjóta á fólk skömmu eftir hádegi á læknamiðstöð þar sem hermenn, sem annað hvort eru á leið í hernað erlendis eða nýkomnir til baka, gangast undir læknisskoðun.

Nokkur vitni segja hann hafa hrópað eitthvað um mikilfengleika guðs þegar hann hóf skothríðina.

Í fyrstu var talið að Hasan hafi látist í átökunum, en síðar kom í ljós að hann var á lífi. Ekki var heldur talið útilokað að sumir hinna látnu hefðu orðið fyrir skotum úr byssu Hasans heldur frá öðrum sem brugðust við og skutu til baka. Ótrúlegt þykir að honum hafi tekist að drepa og særa svo marga.

gudsteinn@frettabladid.is