Byssumanninum hugsanlega sleppt í dag

Magnús Már Guðmundsson skrifar 20. nóvember 2009 10:00

Gæsluvarðhald yfir manninum sem hleypti fimm haglabyssuskotum á útidyrahurð íbúðahúss í Seljahverfi um síðustu helgi rennur út í dag. Ekki hefur verið tekin ákvörðun um hvort að óskað verði eftir því að maðurinn verði áfram í varðhaldi, að sögn Friðriks Smára Björgvinssonar yfirlögregluþjóns hjá rannsóknardeild lögreglunnar á höfuðborgarsvæðinu. Ákvörðun um það verður tekin síðar í dag.

Líkt og fram hefur komið í fréttum var bankað upp á hús í Seljahverfi aðfaranótt sunnudags. Þegar íbúinn kom til dyra stóð þar maður vopnaður haglabyssu sem sló til hans með byssuskaftinu. Íbúinn náði að loka útidyrahurðinni en þá hleypti maðurinn fimm haglabyssuskotum af, en skotin höfnuðu í hurðinni auk þess sem gluggi í forstofu brotnaði. Með byssumanninum var kærasta hans, sem er fyrrverandi starfsmaður íbúans. Hann hafði skömmu áður sagt henni upp störfum í bakarí þar sem hann er yfirmaður

Byssumaðurinn hefur játað árásina en rannsókn lögreglu hefur meðal annars beinst að því hversu mikið tjón hann ætlaði fórnarlambi sínu.

Tengdar fréttir

Par til yfirheyrslu vegna skotárásar

Rannsóknarlögreglumenn eru með ungt par til yfirheyrslu vegna skotárásarinnar í Þverárseli aðfararnótt sunnudagsins. Að sögn Friðriks Smára er parið íslenskt og er karlmaðurinn á þrítugsaldri.

16. nóvember 2009 10:12

Nágranninn mætti með haglabyssu

Íbúi í kjallara mannsins sem varð fyrir árás byssumanns aðfaranótt sunnudags, mætti sjálfur á vettvang með haglabyssu þegar hann varð var við lætin á efri hæðinni. Árásarmaðurinn var þá á bak og burt.

18. nóvember 2009 13:53

Parið væntanlega vistað í fangaklefum á Hverfisgötu

Ekki er pláss fyrir unga parið sem grunað erum að hafa skotið á hús í Seljahverfi um helgina í íslenskum fangelsum. Krafist var gæsluvarðhalds yfir fólkinu í dag og verði héraðsdómur við beiðni lögreglu verður fólkið að öllum líkindum vistað í fangaklefum lögreglunnar á Hverfisgötu, að sögn Páls Winkel fangelsismálastjóra.

16. nóvember 2009 17:56

Parið var í hefndarleiðangri - stúlkunni sleppt

Karl sem gekk berserksgang með haglabyssu í Breiðholti um helgina var úrskurðaður í gæsluvarðhald síðdegis. Vinkonu hans var vikið úr starfi, og vildi hann hefna sín á fyrrverandi vinnuveitanda hennar.

16. nóvember 2009 18:36

Gæsluvarðhalds krafist yfir Þverárselsparinu

Lögreglan krefst gæsluvarðhalds yfir unga parinu sem grunað er um að hafa skotið á hús við Þverársel í Seljahverfi aðfararnótt sunnudagsins. Að sögn Friðriks Smára Björgvinssonar, yfirlögregluþjóns hjá rannsóknardeild lögreglunnar á höfuðborgarsvæðinu, var krafan tekin fyrir í Héraðsdómi Reykjavíkur klukkan fjögur í dag. Friðrik Smári sagðist gera ráð fyrir að farið yrði fram á vikulangt varðhald.

16. nóvember 2009 16:15

Skotið á mann í Seljahverfi - handtökur framkvæmdar

Maður hóf skothríð í Seljahverfi í Breiðholti aðfararnótt sunnudags. Lögregla hefur leitað skotmannsins frá því árásin átti sér stað og herma heimildir fréttastofu að einhverjar handtökur hafi verið framkvæmdar en óljóst er hvort sá er skaut úr byssunni sé kominn á bak við lás og slá.

16. nóvember 2009 06:41