Obama í Asíuferð til að styrkja tengslin

Barack Obama Bandaríkjaforseti hóf vikulanga Asíuferð sína á því að hitta Yukio Hatoyama, sem nýlega tók við sem forsætisráðherra Japans.

Á blaðamannafundi þeirra í Tókýó sagði Obama meðal annars stutt í að hann tæki ákvörðun um framhald hernaðar Bandaríkjamanna í Afganistan. Hann sagðist fyrst vilja tryggja að rétt ákvörðun yrði tekin. Hann sagðist ekki vera að bíða eftir nýjum upplýsingum og neitaði því að hik væri komið á Bandaríkjamenn gagnvart Afganistan.

Hatoyama skýrði hins vegar frá því að Japanar myndu hætta að veita eldsneytisaðstöðu fyrir Bandaríkjaher á leiðinni frá Bandaríkjunum til Afganistans. Hann sagði þó að Japanar myndu gefa fimm milljónir dala til uppbyggingar í Afganistan.

Þeir Obama og Hatoyama hétu því að styrkja tengsl ríkjanna á ný. Nokkur óvissa hefur þó ríkt um samband Japans og Bandaríkjanna undanfarið.

Hatoyama hafði í kosninga­baráttunni verið gagnrýninn á náið vinasamband fyrri Japansstjórnar við Bandaríkin, og lagði þá meðal annars áherslu á að herstöðvar Bandaríkjanna í Japan yrðu fluttar frá þéttbýlum svæðum.

Eitt viðkvæmasta deilumál ríkjanna snýst um bandarískar herstöðvar á eyjunni Okinawa. Bandaríkjamenn litu svo á að samið hefði verið um framtíð þeirra fyrir þremur árum, en Hatoyama hefur sagt nauðsynlegt að taka þá samninga til endurskoðunar.

Hatoyama telur best að færa herstöðvarnar alveg frá Okinawa, en Bandaríkjamenn vilja færa þær á afskekktari stað á eyjunum, eins og um var samið árið 2006.

„Við Yukio vorum báðir kosnir út á loforð um breytingar,“ sagði Obama. Hann sagði verkefnið nú vera að finna nýjar leiðir til að endurnýja tengsl landanna. Hann sagði tengsl Japans og Bandaríkjanna vera á jafnræðisgrundvelli og markmið beggja væri að tryggja vörn Japans með sem minnstu raski fyrir íbúana.

Obama verður á ferð um Asíu næstu vikuna til þess að styrkja tengsl Bandaríkjanna við þennan heimshluta, sem nú er í miklum uppgangi.

Hann ætlar næst til Singapúr, þá til Kína og síðan til Suður-Kóreu.

gudsteinn@frettabladid.is