Mál séra Gunnars vekur upp guðfræðilegar spurningar

„Fyrir okkur er það líka alvarleg staða að lesa megi út úr ferli þessa máls, að Þjóðkirkjan skuli ætla sér annað réttarfar en samfélagið sem hún á að þjóna. Það vekur einnig upp guðfræðilegar spurningar í lúterskri kirkju," þetta er meðal þess sem kemur fram í bréfi sem tíu prestar hafa skrifað Biskupi Íslands til varnar séra Gunnari Björnssyni, en Gunnar hefur sem kunnugt er verið í leyfi síðustu tvö árin vegna ásakana um kynferðisbrot gegn sóknarbörnum sínum.

Prestarnir skrifa Biskupi bréfið þann 12.september síðast liðinn en eins og komið hefur fram í fréttum fór Biskup fram á að séra Gunnar snéri ekki aftur í Selfosskirkju heldur tæki að sér embætti sérþjónustuprests við Biskupsstofu í Reykjavík.

Biskup Íslands telur að séra Gunnari Björnssyni beri að víkja frá Selfossi, með vísan í lög um réttindi og skyldur starfsmanna ríkisins. Gunnar ætlar sér hvergi og hefur boðað til fundar með stuðningsmönnum á Selfossi í kvöld.

Nánar verður fjallað um málið í Kvöldfréttum Stöðvar 2 klukkan 18:30.