Skattheimtan hamlar olíuleit á Drekanum

Íslensku olíuskattarnir hafa áður verið gagnrýndir, meðal annars af óháðum norskum sérfræðingi, og á fundi með fulltrúum íslenskra stjórnvalda í gær komu fulltrúar hins norska Sagex Petrolium og hins íslenska Lindir Exploration því á framfæri að skattkerfið fældi alþjóðleg olíufélög frá Drekasvæðinu. Að sögn Þórarins Sveins Arnarsonar, verkefnisstjóra olíuleitar hjá Orkustofnun, finnst þeim skattkerfið ekki aðlaðandi og ekki hvetjandi fyrir fyrirtækin að koma hingað og leita að olíu. Þeir hafi komið þessum athugasemdum sínum á framfæri.

Terje Hagevang, forstjóri Sagex, sagði í gær að fyrsti borpallurinn kæmi ekki á Drekann nema það tækist að vekja áhuga fleiri olíufélaga á svæðinu.

Olíufélögin gera ekki athugasemd við að íslenska ríkið ætli að taka allt að 59 prósenta skatt af olíugróðanum, enda er það lægra hlutfall en í Noregi. Það sem pirrar þau er svokallað vinnslugjald sem leggst á áður en hagnaður myndast af olíuvinnslunni.

Skattarnir voru aðalmálið á fundinum í gærmorgun en þangað voru sérstaklega fengnir fulltrúar frá fjármálaráðuneyti og ríkisskattstjóra. Hvort þetta valdi áhyggjum svarar Þórarinn Sveinn að þeir taki þessar athugasemdir vissulega alvarlega. Hann segir það þó ekki sitt hlutverk að svara því hvort taka eigi skattkerfið til endurskoðunar. Það þurfi þó allavega að skoða það mjög alvarlega.