Chelsea og Liverpool orðuð við Adam Johnson

Gordon Strachan, nýráðinn knattspyrnustjóri Middlesbrough, viðurkennir í samtali við enska fjölmiðla í dag að fyrrum enski U-21 árs landsliðsmaðurinn Adam Johnson sé mjög líklega á förum frá félaginu í janúar.

Samningur hins 22 ára gamla Johnson rennur út næsta sumar og viðræður á milli leikmannsins og forráðamanna Boro hafa siglt í strand og því er talið líklegt að félagið reyni að selja hann í janúar til þess að fá einhvern pening fyrir hann.

Johnson er metinn á 10 milljónir punda en Sunderland er sterklega orðað við vængmanninn auk þess sem Chelsea og Liverpool eru sögð vera að fylgjast náið með gangi mála hjá honum.